Kooperashon entre ACU i Girobank

Kooperashon entre ACU i Girobank

Nos vishon fuerte i trabounan duru pa ta e kooperativa di mas grandi, mihó i mas inovativo den Karibe Hulandes a resultá den un kompromiso pa konsentrá mas riba duna mas i mihó servisio na e sosio. Esaki ta enserá, entre otro, un uzo mas efektivo i efisiente di e karchi di ATM ( ACUito).

Den e kuadro aki resien ACU a yega un akuerdo di kooperashon ku Girobank pa brinda mas servisio na klientenan di ámbos instansia. E akuerdo aki ta brinda ACU e oportunidat pa ofresé su sosionan un infrastruktura mas amplio di ATM.

E benefisio prinsipal ta ku awor por usa ACUito na tur mashin di ‘swipe’  i tambe ATM-nan di Girobank. Esaki ta kumbiniente pa e sosio ku di awor en adelante por usa su ACUito na hopi mas tantu ATM ku tabata e kaso ántes. E fasilidat èkstra di pago ku por ofresé awor ta un benefisio atraktivo pa e míles di sosionan di ACU ku kier hasi kompra na e diferente kasnan komersial.

Aktualmente Girobank ta disponé di 21 ATM i mas di 340 punto di pago na kasnan komersial rònt Kòrsou. Na Bonaire, Girobank ta disponé di 3 ATM i mas di 28 puntonan di pago na kasnan komersial. Pa e sosionan na Bonaire esaki sigur ta un bon notisia ya ku awor nan tambe por disponé di nan fondonan na un manera muchu mas fásil i lihé.

Tantu ACU komo Girobank ta pone hopi atenshon na siguridat di tantu mashinnan di ‘swipe’ komo ATM-nan. Pa e motibu aki, sosionan por hasi uso di e servisionan di un forma trankil i sigur. Di otro banda, introdukshon di e fasilidat di pago aki ta hopi fleksibel; e sosio no tin ku hasi niun akshon èkstra i por probechá mes ora di e servisio nobo.

E gastunan enbolbí pa lanta sèn na un di e ATM-nan di Girobank lo ta Naf 1,75 i USD 0,98 pa transakshon respektivamente na Kòrsou i Bonaire. Sosionan ku lanta sèn na un di e ATM-nan di Girobank na Kòrsou, por hasi esaki solamente na florin. No tin gastu enbolbí ora hasi uso di mashinnan di ‘swipe’.

Pa fasilitá e kliente, tin un lista di tur tienda i otro tipo di negoshi  ku ta hasi uso di un mashin di ‘swipe’ di Girobank riba www.girobank.cw i tambe riba www.acu.cw. Banda di esaki, tur e negoshinan tin un anunsio visual pa laga e kliente sa ku por usa e ACUito serka nan.

ACU ta sumamente orguyoso ku e logro aki, i un danki spesial ta bai na gerensia di Girobank pa e kolaborashon aki. Pa mas informashon por komuniká via telefón ku ACU su Sentro pa Kliente na 434-7100 òf manda un e-mail na info@acu.cw